Luk 16 | BEF | STEP | Yesu koko panana'a ma luto lu epi'ehina: Fe'noho bo mone minolata hina bomofihi kaba bo'a mone minolata hu'ehina yabe. Ya higo bona'i luga'amagi ana fe'noho bomofihi ma lite lu emi'ahana yabe: Kaba bokauba efahakamo he'mi su nohabe.

Luke 16

Kaba bo moneuba lili'na li bati mehu'ehinamofihi bame ka'a

1 Yesu koko panana'a ma luto lu epi'ehina: Fe'noho bo mone minolata hina bomofihi kaba bo'a mone minolata hu'ehina yabe. Ya higo bona'i luga'amagi ana fe'noho bomofihi ma lite lu emi'ahana yabe: Kaba bokauba efahakamo he'mi su nohabe. 2 Ya lago ana fe'noho bouba kaba bo'a kehe iloto ma luto loka ho'ehina: Hena hu'ahanogo kai kaga ya'ma nokehelube? Kai asaga fe'noha'ni ma'asi buto leka so su holoto fayahi go molo su ho netobo. Kai aku'i asaga'na nani'nilo kaba bo yatai meminalane'mu nolube. 3 Ya luto fe'noho bouba ligo ana kaba bouba ma luto lu'ehina: Nani sipi bo'niuba lili'na'niloti a'nele'mo he'milube'mu linogo nani hena'ni hilube? Nani amuya moloto ke'muya mekifila to fato bona'i nose'na'mu kehe iluna nubuya'ni hilina'mu yabe. 4 Ya hu'ehina yatai nekesa mone'ya noyugube. Lili'na'niloti sipi bo'niuba nele'mo he'minogomo bo moneuba noha'aluga nele'mo bati huloto nele'mo bilina bomofihi nonuga bilube. 5 Yalo ai asaga bona'i sipi bo'amofihi efahi tina hi'ahana bona'i mone'isi mone'isi kehe iloto yata'a bomofihi henaki sipi bo'nimofitoga tina hu'ahane? 6 Nani 100 mesebe kopo li'ohube lilina'mu yabe. Ya linogo kaba bouba tina'alo tiketi noemito mele'isi malo minoto 50 yabe luto gobo, lu'ehina. 7 To mone bomofihi loka ho'ehina: Kaibe, kai henaki tina hu'ahane? Mone tauseni'a kile gu'i li'ohube. Tinalo tiketika malo nolito 800 yabe luto fayahi gobo, luto kaba bouba lilina'mu yabe. 8 To alihi sipi bouba ana kaba bomofihi bu goloto yege fi'ehina yabe. Hena'mugope ai lataha'anigu bebe sana bona'magihi suhi li'ehina. Ma melugu bona'magi enali ya huse bona'i hiti lili'na moneka lilana, enali Hu'ma ka mege'i nemalana bona'i enahalana'mu yabe. Guminalo hapa'a ya'ma keheli bati nehabe, luto Yesu lu'ehina.

9 Nani lu nolepube, luto Yesu mone hiti ma lu'ehina: Lenali bati mehina efahi ma melugu nina hiti lenali bona'i enele'mo bati hite enele'mo lenalalutinigi enele'mo lolo hilafiye? O'e. Ya hilenogo alihi efahi lise kana'a su halina yupahi lenali lenele'mete kokulumatoga minoba minoba hepato bilanafiye? O'e, luto Yesu lu epi'ehina yabe. 10 To bo moneuba nesi'nasilo kaba huto hilinamofi to amuya moloto kaba hu bati hilina alihi sipina huto hilinalo ana huto kaba hu bati hilina'mu yabe. To bo moneuba nesi'nasilo kaba hu bati mehilina ana huto sipina huto hilinalo kaba hu bati mehilina'mu yabe. 11 Ma melugu bati'na'a kaba hu bati mehilata alihi kokuluma hepalugu lusi bati'na'a hena huto kaba hilana ni'ibe? 12 To kai bo mone'mofihi efaha'afi fe'noha'afi kaba hu bati mehilata yana'mu kai efahakafi fe'nohakafi kuyu'afu kimilina ni'ibe?

13 Sipi bo loemale'i lili'na'atiti moneko bouba lilina'a huto meni'ibe. Mone'mofihi ipakafa nohoto mone'mofihi fokehi halina'mu yabe. To mone'mofihi le'mo bati nohuto mone'mofihi le'mo hale hilina'mu yabe. Lenali moneko kumu Hu'mamofihi nasana'a le'mo bati nehite efahi le'mo bati nehite mehilana'mu yabe, luto Yesu lu epi'ehina yabe.

Yesuhi kaga mone mege ka li'ahana

Mt 11:12-13; 5:31-32; Mk 10:11-12

14 Felosi bona'magi asaga kaga Yesu lina kehelilete kiya hi ete'ahana yabe. Hena'mugope enali efa kumu'i bati'nati yabe lite li enogolagalo nemalana bona'magi yabe. 15 Yesu ma luto ana Felosi bona'i lu epi'ehina: Asaga bomagihi enubulo lenali bati hu'ohuta bo nohune lite lilata nehanaya Hu'mau komopatinigu bu go fulu tuto abu go'ehibe. Bona'magi enali hetofa fe'nohati yabe lite li pili kete minelata nehananaya Hu'mamofihi bulo kisilito tuguma bito bati mehinana ni'ibe.

16 Mosehi keya kaga'a hiti to lu huto huto bona'magi kaga keye'ahanana hiti Yonihi kanalo mino bati hu'ehina yabe. Ya hu'ehina Yoniu minana kana'aloti oto oto yatai ya'ma yupahi Hu'mamofihi ka lamana'amofihi kapo'a asaga hepatoga huto nohibe. Ya nohigo asaga bona'i amuya melete peninite Hu'mamofihi ana kapo'alo li hokolo hite bilune'mu nehabe. 17 Alihi kokuluma hiti me'i hiti su hoto bilinaya keya ka'a nesi kasi hupamone'i mone ninaya su hoto mebilina'mu yabe, luto Yesu lu epi'ehina yabe.

18 Bo moneuba liha'a nohe'mi etoto fato a'i liha'a lilina ai bo alobo sibi sibina higo foipana'a nominabe. To bo moneuba liha'a le'mo he'mi'ehilina fato bouba liha'ni yabe luto lilina ai ana bouba sipi foipana'a li huto hulata nohibe, luto Yesu lu epi'ehina yabe.

Lasalasi to fe'noho bo

19 Bo moneuba efaha'a babu luto ni'igo ai asaga yupahi hetofa gu kata hepilata huto to hetofa hatofa nose'na babu luto nolata huto mino'ehina yabe. 20 To, kasiha'alo bo mone gi'a Lasalasi, analo kolata hu'ehina yabe. Ai kene'i nohuto to gufa'alo hepuhi babu luto loba loba huto mino'ehibe. To kene'i nohuto to kau'na nohoto ana sipi bomofihi nose'na letuha'a bati huto natita'mu yabe. To anaga nokago kalamagi ete hepuha'a kehe nenete mine'ahana yabe. 22 Ya huto minoloto'a alihi fililago agelomagi le'mete bite Abalaha koyapa filito bu'ehina hepatoga le'mete bago Abalahau ai nu kito mino'ehina yabe. To, alihi yupahi ana sipi fenoho bomo ai ana huto fililago keli he'ahana yabe. 23 To ai logo hepa'mo ai'a Hete hepa'i anaga buto gabu sipi'a nogigo ya nohuto hiha lu'ehina: Akae. Akae, luto minoloto bu go saga huto'a Abalaha foto'i nohuto Lasalasihi nu ki'ehinalo bu go'ehina yabe. 24 To, bu nogoto kehe ito ma lu'ehibe: Oho. Abalahao, afo'nigase. Keke'i nolu netobo. Kai Lasalasi ho lifigo ai yaha'a nagamilugu mololoto kenetufa'niloga mololenogo ketipa ilina'mu yabe. Nani mana logo guluya me'mogu nagabu'ni sipi nogigo nohunagihe. 25 To Abalahau ma lu emi'ehibe: Pana'ni. Koyapa hapaka beto hubo. Kai koyapa ana'inaka hetofana babu luto ni'igo, kofokehi luto mino'ahata yabe. To Lasalasi ai koyapa kene'i nohuto sibina huto mino'ehina yabe. To yatai ai bati huto nohigo to kai kagabu'i nogigo nominane. 26 To lali hiya huto kehe'malune. Folaganugu mone sipi yaba'mo ni'igo bo moneuba lali kegi'agati kaitoga bilina kapo meni'ibe. To ana huto kai beletogati lalitoga alina mone meni'ibe 27 To Abalahau ya ligo ai ma lu'ehina: Ke. Afo'nigase. Yalo Lasalasi afo'nifihi hepatoga ho lifibo. 28 Nani nogona'ni 5 magi nehana. Enali ya'mana gabu'i gise hepatoga mealabe luto Lasalasiu lipoti epilina ni'ibe. 29 Ya ligo, Abalahau ka'alo nona'a lu emi'ehina: Henabe luto ho lifilube luto, mono buku ni'ibe. Moseu koyo'ehina ka hiti, to Hu'mamofihi ka lu huto hulata bona'mo keye'ahana ka hiti ni'ina yabe. Ana kaga kehelilana'mu yabe, ligo 30 ai: O'e. Abalahao, afo'nigase, mekehelilabe luto, to bo mone fili'ehina bouba aku'i anagati ho tito buto kaga lu epinogomo ka kehelite komopa'ani i gelehe hilana'mu yabe, ligo 31 ai: O'e luto, enali koyapa koyo'ehina kagamo mekehelise nehanagi to ana huto fili'ehina bo moneuba fili'ehinagati ho tito buto kaga lu epinogomo ka'a ana hite mekehelilana'mu komopa'ani ule'ale hite minalabe, lu emi'ehina. Yesu ya luto lu'ehina kilihe'i yabe.